Til hovedsiden
  Heim  >  Nytt 2018  2017  2016  2015  2014  2013  2012  2011  2010  2009  2008  2007  2006  2005  2004 
 Des  Nov  Okt  Sep  Aug  Jul  Jun  Mai  Apr  Mar  Feb  Jan 

Nytt Feb 2012

Wergeland brukt
Lørdag 25.

Fødde i fjøslukt
Lørdag 18.

Akademi og avantgarde
Fredag 17.

Ytringsfridom for dei papirlause?
Torsdag 16.

Wislawa Szymborska
Søndag 5.

Din nye, korleis er ho?
Fredag 3.

Lørdag 18. Februar 2012

Fødde i fjøslukt

Dikt kan fint brukast som debattinnlegg. Slik har poeten Helge Torvund skrive eit dikt til Arild Rønsen, journalist og Oslopatriot, med fast kommentarspalte i Klassekampen.



Å, dumme bønder som vart fødde i fjøslukta utanbys.
Her i Oslo er eit naturleg sentrum for liv og lys.
Her skriv me med lyset sitt eige språk, og me ler!
Me ler av desse raringane som ikkje vaks opp her.

Eg likar å lesa Edvard Hoem sitt rare nynorske språk.
Men kvifor skal ein læra å skriva slik? Ikkje bråk
meir nå med sidemålet og det døyande målet.
Samisk og nynorsk og mange fleire hamnar snart på bålet.

Slik må det vera, og det fungerer bra
med bokmål for meg. Det betyr
at det òg må vera godt nok for deg. Ja

å ha eit skriftspråk for andre vert ein dyr
og unødig luksus. Ver glad
om alle får skriva nett som meg, ein innfødd Oslofyr.



Dette er sitert frå debattsida i avisa 17/2. (Kva Arild Rønsen har sagt om nynorsk i avisa som han skriv fast i, har eg ikkje - så langt - lese.) Saka er elles jamstillinga av to språk i skolen. Det står eit hovudstad-basert politisk miljø bak den regjeringa som no lanserer bortfall av karakter i «sidemål» i skolen, og dette vil i praksis seie at nynorsk blir utprioritert. Formelt kjem forslaget frå utdannings-direktoratet som ei skolesak - .

Mange har brått meldt seg inn i Noregs Mållag som ein følgje av forslaget. Og fleire bør gjere det, meiner eg. Dessutan rår eg både forfattarar og andre som bruker nynorsk som hovudmål eller som sidemål, om å hive dykk på i avisspaltene og i sosiale fora på nettet med nynorsk.